قالوا لي مصر خلاص .. من عبطي قلت خلاص

ما تزعليش يا بلد .. 
ابني الصَغير قالها

لما الكبار خانوا … 
لما الكرام هانوا

قامت بلد تنتفض 
بشبابها وعيالها

إيه يعني معنى حياة مدهونة بمهانة

صرخة ف قلب الميدان .. حرية وكرامة

قام الشباب ينتفض ..

قال الكرامة نضال .. 
وبدمه اهو نالها

- - - - - -

محلا الورود يا بلد 
مروية جهد ودم

ايدين شباب ع الكيبورد .. 
قالت لنا نتلم

وف الميدان ..
اللي ما كان فيه ريحة من اسمه

تدينا درس كرامة .. 
مش بالقلم .. بالدم

———–

صوتك وحشني يا مصر …. 
من بدري ما سمعتوش

وحشني حسه الجميل

كترت جيوش أبرهة … 
على كعبتك في الليل

قام غصن أخضر طري .. 
شارب حليب أمه

يفتح لنا السكة 

وينورك يا سبيل

الشكل أخضر طري

والفعل طير أبابيل