بعد ما رجعت من الشركة وطلعت عيني ف الطريق قلت آكل وافتح اللاب توب أتفرج لي علي فيلم جديد دورت علي عيش ما لقيتش قلت أنزل أجيب أي حاجة آكلها .. وياريتني ما نزلت .. لقيت عم مغرز - مش عارف اسمه ده جه منين - قاعد كأنه مستنيني وبعد السلام و..
- والنبي لتشرفنا وتشرب معايا كوباية شاي يا باشا.
- عليه الصلاة والسلام يا عم مغرز .. والله لسه راجع م الشغل وتعبان .. هاشترى شوية حاجات من ع الناصية ف السريع وأطلع.
ولا كإني قلت حاجة.. سحب كرسي وحطه فوق الرصيف وطلب لي كوباية شاي .. وبدأ..
- مش عارف الدنيا جرى فيها إيه؟ وليه البني أدم أول ما يقعد على كرسى المعلم يبقى كده..
- كده ازاي يعني؟
- كده زي المعلم بتاعنا - يقصد صاحب المحل - عايش ف دور رئيس الجمهورية .. دا حتى رئيس الجمهورية بيجيله يوم ويمشي .. بمزاجه بقى وللا بإرادة ربنا. المهم بيمشي.. إنما ده تقولش ما حدش فتح محل مكوة غيره!! يالله أهي أرزاق مقسمها الخلاق.. اللي مش فاهمه هوه ليه بيشتغل بإيده مع إننا كتيييير ما شاء الله .. أكتر من أربع صنايعية.. وماحدش فينا عاجبه..
- ايه اللي مضايقك بس يا عمنا يمكن الراجل خايف ينسي الشغل.
- ينسي ايه يا باشا هو احنا شغالين ف معمل.. دا انت لو قعدت ميت سنة ما تكويش هاترجع تشتغل وانت مغمض.. المهم الذمة في الشغل .. عندك أنا لو رجعت أشتغل تاني وربنا ما هتلاقي ف نضافة شغلي.
- الله هو انت مش شغال يا عم مغرز وللا إيه؟
- شغال يا باشا بس مش ف الكوي .. شغلتي أنا بقي دلوقت زي ما سعادتك عارف إني أكيس .. أحط الشغل ف الاكياس يعني.. ويا سلام بقي لو قميص من دول راح للزبون وفيه حتة مكرمشة.. تخرب الدنيا والريس يبص لي بصة كإني قتلت أبوه .. يا سيدنا مش أنا اللي كاويه .. شوف الصنايعية اللي عندك وقول لهم يراعو ربنا ف أكل عيشهم.. لكن لا حياة لمن تجائر.. دايما اللي يكلمه يطلعه بيجائر.. تاخد وتدي معاه ف الكلام إزاي بقى؟ وياخراب بيتي وبيت الواد اللي وصل الشغل للزبون.. يا سيدنا هات صنايعية عدلة.. أبقى أنا طبعا اللي غلطان عشان ما بشوفش.. هو صحيح ساعات أنا اللي بغلط ف موضوع التكييس ده بس قولي أعمل إيه .. ببص ع الزراير والتطبيق والياقة عدلة وللا لأ وللا لو زرار موجود بس مش مقفول ولابس ف العروة صح.. طبعا لي حق بعد كل ده أنسى ساعات أبص عدل علي الإكياس نفسها.. ألاقيه بيزغر لي: شفت آدي المكوة زي الفل وانت اللي مش عارف تشوف شغلك!!!
الشاي لسه ما جاش ولو قمت هابقى سبته وماعبرتوش .. مش عارف أطلع من مغرز عم مغرز ده ازاي.
- ولا يهمك يا عمنا كل شغل فيه قرفه.. هي الدنيا كده
- ايو بس مش كده يا جدع .. لا مؤاخذه يا باشا ما سيادتك جدع برضه.. بس الواحد جنابه هاتفرقع م الغيظ والمحلسة بتاعة الصنايعية الغم دول تصدق بمين.. لا إله إلا الله.. النهارده ع العصر كده الكهربا قطعت.. عادي يعني بتحصل في أحسن الأحياء والأموات كمان.. حلوة الأحياء والأموات دي يا بيه .. طب والله بتحصل علي طول .. مش بتحصل دي عندكم ف الشركة يا باشا؟
- بتحصل يا عم الرغاي.. طبعا النص الأخير من الجملة قلته في سري.
- المهم سألنا قالوا لنا هاتيجي بعد ساعتين .. اللي نقطني لقيت لك أكبر صنايعي عندنا.. التوبّ الكبير بتاعنا بكل بساطة لقيته قلب وشه كأن أمه ماتت وقال : طيب افرض دلوقت الاسطي بعت لنا شغل لزبون مهم! هانعمل ايه في المغرز ده؟ كنت لسه هانفجر ف وشه واقول له واحنا ذنبنا ايه يا عم واحنا مال أبونا؟ لقيت لك كل الصنايعية ف نفس واحد بيقولوله صحيح دا مغرز كبير.. هانعمل ايه دلوقت؟ شفت الخيبة.. كأن أمهم اللي قطعت الكهربا!
قول لي يا باشا أنا اللي عبيط ومش فاهم وللا كل الدنيا بقت كده.. وللا كلهم كده وأنا اللي كنت مش عايش العشرين سنة اللي فاتوا؟
مش عارف أقول لكم صدمتي كانت قد ايه من كلامه .. مش عشانه رغاي وللا بيتكلم ف حاجة هايفة.. عشان اللي بيقوله حصل النهاردة - تبك الأسل - ف الشغل!!!!..
المشاركات
ليست هناك تعليقات:
إرسال تعليق