سيس

قريت بحث لذيذ قوي ع النت عن شباب عايزين يدخلوا

حرف جديد علي اللغة العربية ألا وهو حرف الـ (سيس) مواكب للتطورالحادث على صعيد الروشنة على أن يوضع بين حرفي السين والشين.. وتكون صورته كالتالي س عليها نقطة واحد للتفرقة بينه وبين السين والشين..

أخيرا.. اخترعنا حاجة جديدة وعاشت أبو الليف حرة مستقلة

عاطف

امبارح كان أحمد عاطف بيدور علي محاضرات تنمية بشرة ع النت .. ويالهول كمية الأسماء اللي طلعت له .. بحر من دكاترة التنمية البشرية... لقيته بيقول لي : لو كل دول دكاترة .. أمال مين اللي هايتعالج.

عن الريس متقال وتمورة

البت بيضا بيضا بيضا .. البت بيضا وأنا أعمل إيه.. يا ربنا سامعين االوعة اللي بيتكلم بيها.. تحس انه جمع فأوجز.. كمية الذهول والصدمة والشلل التام تجاه جمال المعشوقة وحسنها .. مش عارف يعمل حاجة.. تنح.. هننج.. أقول لكم إيه تاني دي البنت بيضا وبس...

وللا الملك منير لما يغني من الفولكلور: نعناع الجنينة المسقي في حيضانه.. شجر الموز طرح ضلل على عيدانه.. شايف الشاعر المجهول ازاي بيتكلم عن حاجات حسية من غير ما يقول وللا كلمة خارجة.. خلا البنات ورق نعناع جميل ضعيف مستكين ف الحوض اللي مزروع فيه وورق الموز العريض ضليلة تحمي البنات بكل رجولة وعشق .. مع ما للموز من شكل موحي بالذكورة والمرجلة..

كنت عايز أكتب أمثلة عن الاسفاف من عينة خليها تاكلك.. بس لقيت إنه حرام أرش ع الورد كولونيا خمس خمسات