تعمل إيه؟؟
لو تصحى الصبح تلاقي نفسك
مش فارقة معاك نفسك
ولا انت عايش ولا نِفسك
حتى تخرّج نَفَسَك
صوتك مكتوووووووووووم
وشفايفك .. قفلاها مخالب بوم
ووجودك كله عدم .. ملموس .. محسوس .. محتوم
هاتقول لي أدوّر على نفسي!
هاضحك بمرارة واقول لك:
المسألة .. إن انا أصلا مش عايز أحاول
دول مش حبة اقلام ضاعوا
وللا ميدالية مفاتيح
ولا ورقة كراس…
شخبطت عليها حياتك..
وشوية ووقعت جنب الترابيزة.
ولا أكلة لذيذة…
هاتوجع بطنك
_ بعد ما كانت هايقطعها الجوع_
وتقول معلش
وتشد لحافك م البرد
تدوّر على حضن مراتك
تلقاها بتاكل رز ملايكة ومش عايزة تقوم.
- دا انت مكسل حتى تهش البوم من على وشك!
- بتقول لي مكسل؟!
أنا لو كنت مكسل.. معناها …
اني هاكون فكرت أقوم
أو أحرك إيدي بنفسي
طب فين نفسي عشان أحرك إيدي؟
- واضح انك هاتجنني معاك
وهاتكئبني.
- لا يا عم بلاش
خليك قاعد مش عايز منك ولا كلمة
ولا صوت مسموع
ما انا كنت ف حالي
انت اللي دخلت
وفتحت معايا الموضوع!
http://oombenanemshy.maktoobblog.com/123/الصوت-المكتوم/
المشاركات
ليست هناك تعليقات:
إرسال تعليق