فليشر

كتير بنكون عاملين زي النور الباهت … روحنا مطفية .. حتى لو قعدنا مع ناس بتتكلم ف قضايا كبيرة تهمنا.. لكن ما بنلاقيش جوانا القوة.. الكهربا اللي تخلينا ننور ونقول رأينا بوضوح .. بيبقى الكلام جوانا بس مش عايزين نقوله.. معرفش ليه وامتى بتجيلي الحالة دي .. بس بتيجي.. وبتبقي الدنيا كلها مش فارقة .. يعنى هو كلامي اللي هايعدل الكون .. ما احنا ياما بنرغي وياما كل الناس بتقول….
ساعات تانية ببقي منور والكهربا عندي كأني قاعد فوق سد أسوان.. كل كلمة أو موضوع نقاش ليه عندي رد مقنع .. الأكثر إن أنا اللي بفتح النقاشات واعلق عليها بكل حماس .. وإن الله لا يغير ما بقوم حتى يغيروا ما بأنفسهم .. ولازم نتغير ويكون لينا بصمة وتأثير على الحياة حوالينا.. لازم اللي يعدي بعدي ف السكة يشاور على علامة سبتها ويقول : مر من هنا رجل عظيم!! عمل حاجة.. إيه هي الحاجة دي؟ معرفش بس لازم نعمل حاجة…

ساعات تالتة ببقى هادي واتدخل بس ف الوقت اللي الاقى فيه اللي بيتكلم قدامي تجاوز أو قال حاجة شاذة قوي .. ما ينفعش تعدى والناس تصدقها .. ساعتها بحس اني عامل زي لمبة الاتجاهات ف العربية (الفليشر) بنور واطفي بس عشان انبه اللي قدامي لحاجة ضرورية..

في كل حالاتي دي ببقي بقنع نفسي ان الحالة اللي انا فيها هي أنسب الحالات .. لكن ف العموم أظن إني بحب حالة النور المتقطع جدا الفليشر… حاجة كده زي التيار المتردد اللي خدناه زمان ف الفيزيا .. هو اللي على فكرة مشغل الدنيا ومنورها…